BASAH REKUNG

Jeman agi bujang dibai bala sida ayak ngemasahka rekung ba kedai kelip-kelip. Tang anang saru laban tu kira ke dalam kereja atur pengawa ngarika opis ba program ke dikumbai MEDIA NIGHT. Ohaa.....

Ari kiba Lawrence Sigai Duat, Micheal Anchang (Editor Sada), Bro 1, Bro 2 enggau aku.

MADU PENGERINDU

Maya lepa lebuh ke nadai pengawa kami duai sulu ati suah bejalai sebelah mengeri Kuching. Ni alah gawa belama. Ngambi untak entu tentu bangat bepusin. Raun-raun meh ngagai palan ke memanah ba menua kitai.

Tu penguntung diau ba menua ke aman nadai penyarut baka ba menua kitai. Kini-kini pejalai nadai nadai penaggi ati.

Arap ke kitai semua bela ngempu pengidup ruang bilik ke likun sereta lantang. Pengidup ke meruan endang datai ari petara magang. Nya alai, anang lembau kitai muji enggau nyembah Tuhan ti dikarap kitai ngambika pagila lusa pengidup kitai tau lebih betuah belimpah murah jereki. Amin.

Merindang ati ba Pantai Damai, Kuching.

Bejalai mandi ba Sungai Ranchan, Serian.

SAMPI BEREKAT

Puji Tuhan enda berasai nyau genap sebulan bujang sigat anak aba iya udah ada ke dunya. Sari tu kami sebilik begempuru meri tanda terima kasih ngagai petara ke pengawa anak ke pemau dikesayau ke aku Arthur.

Aku ngarap ke nuan seruran gerai belama anak. Nuan meh ke seput nyawa apai di dunya tu.

Kami sebilik gempuru sampi ke staring aku.

SEKULA ANGUS

Gaya sekula SMK Simanggang ke dituntung penusah angus.

Berasai tekenyit asai ati ninga rita sekula ke kala endur aku belajar suba iya SMK Simanggang kena tuntung penusah angus kena lemai 8 haribulan Julai tu tadi.

Penusah nyadi urung pukul 4.00 lemai. Dua bengkah blok ke angus tu iya nya opis bala pengajar enggau kelas nembiak pom empat.

Taja baka nya, puji Tuhan laban nadai nyawa orang ke dipadahka bebadi ba penusah ke nyadi endang disadang lemai nya.

Gaya api ke benung nyerarai.

Aku belajar ba sekula tu kira setaun lebih aja laban ke nyambung pelajar ba pom enam. Sebedau tu aku kala belajar ba SMK Engkilili engggau SK San Semanju.

PENYINU KE APAI INDAI

Akaiii dai...lelak amat asai isi pengudah ke laun pulai gawa malam tu. Baka tu meh pengawa nyadi pemerita kadang-kadang tumu ga pulai, kadang kadang laun. Nitihka atur pengawa ke diberi orang. Malam tu tadi aku diasuh opis cover foundtion YB Datuk Alexander Nanta Linggi ke bejadi pengawa Nyuaka Perais Anugerah Desa Cemerlang enggau Anugerah Desa Sejahtera Peringkat Negeri Sarawak ke diatur Opis KEMAS negeri.

Lebuh ba rantau jalai mulaika diri ke rumah dia deh aku berundingka penyinu diri ngagai nasib ke nuntung kami sebilik. Maya tu aku chukup bendar beridupka indai laban ke udah disahka orang sepital ngembuan penyakit kanser idung. Diatu indai benung bebendar ngelaban igi penyakit nya. Dua kali indai udah diperubat ba hospital ngena chara kemoterapi.

Indai maya agi benung diperubat ba
 wad Radioterapi  Hospital Besai Kuching.

Puji Tuhan laban indai diatu berasai gerai mimit dipeda. Nyawa iya nyau deka makai enda baka suba. Ngenat ke pemedis semak setaun laban ti kelalu pechaya ke jaku mensia mayuh ba rumah panjai ti enda ngasuh berubat ba sepital.

Enti dipajak ba rumah nyangka indai enda nyadi mensia. Nya meh siti utai ke balat ngajar indai empu anang kelalu arap ke jaku rang ba rumah panjai ke ngasuh berubat sebelah manang tauka dukun. Jaku bala manang nya utai ke diamba ke sengapa lalu tau ngasuh kitai d rumah panjai belaya.

Diatu indai chukup suntuk nadai chukup belanja kena berubat. Pia mega kami sebilik bela begunaka belanja magang. Ungkus bayar masuk hospital ngelama tu pan empai dibayar. Aku chukup sebening pala berunding mutarka penanggul ke nuntung apai indai diri.

Ka minta tulung apai, iya pan nadai belanja laban ke enda tentu bepengerai pengudah kena penyakit strok. Bala menyadi pan bela begantung senduk magang-magang. Asapai amat merinsa diau di dunya enti bangat te nadai belanja sereta nadai duit anak belanja ke disimpan mimit-mimit dalam bank.

Baka aku, bangat te baru enseput idup di dunya laban kereja diumba enggau gaji ke enda bangat besai. Pia bebayarka lon kereta  bangat enda chukup endur beputar ga gaji ke bangat sejeput. 

Tusah enti kitai udu suntuk idup di dunya. Enggau apai indai, bala menyadi sereta enggau diri sebilik diri empu pan kaul enda bangat manah laban ke pedis deka betulung. Lebuh enda betulung dia deh kitai nyau baka ke jai enggau pangan diri. Asapai tusah amai....

Kasih nuan Indai. Mina ngagai petara aku besampi ngarapka indai ulih jampat gerai. Penyinu aku ke nuan endang nadai bechiping indai laban aku ingat ke pemanah enggau pementas seduai apai ke udah ngibun sereta ngemesaika aku nyadi orang ke menyadi baka ke sehari tu.

Nyangka aku enda tebalaska budi seduai enggau mata duit tang aku naka ulih kiruh ngidupka seduai lebuh seduai apai pedis indai. Semina petara aja nemu ati aku, baka ni penyayau aku ke seduai indai. AKU SAYAU KE NUAN INDAI...AKU SAYAU KE NUAN APAI. AKU MEGA SAYAU KE DIRI MENYADI. 

ASAP LIAP

Anak bujang enggau sulu ati

Asap liap tauka jodoh seiku-seiku kitai mensia endang ditentuka petara. Tang taja baka nya, dulu agi sebedau pekara nya nyadi. Kitai endang seruran ngiga,belemati ni bagi ke engkeman ba lubuk ati. Suah kitai ninga seiku lelaki tauka indu ngembuan mayuh pangan iya chukup laun belaki tauka bebini. Nyangka iya bedau tetemu ke amat-amat ngam ba ati meh nya kini. Asap liap kitai endang enda temu ni maya iya datai. Kadang-kadang pekara nya datai baka ke dalam mimpi. Lebuh kitai tedani utai nya naddai dipeda agi.

Tang engku enda baka nya. Nyau baka suis. Tekan aja on. Peda te alu idup lampu. Baka nya meh pemujur asap liap aku. Nya meh pemujur diberi petara. Maya ke agi belajar ba universiti menya. Enda mukai-mukai bekelala enggau seiku indu dara ke ngelar diri Indu Ibanba mua bup. Pengudah ke lama  bekelala, lalu labuh meh pengerindu lalu ngujungka nangam tali semaya. 

Puji Tuhan semua nya dikemujurka magang. Pengudah ke diperunding enggau orang tuai kami pan nirika  meligai CINTA. Tingkil 16 JUNE 2012 nya meh hari bulan ke udah dipilih endur ngintu pengerami melah pinang lalu disaksika mensia mayuh ba Rumah Ngindang, Danau Melikin, Balai Ringin.

Meri besai terima kasih ngagai Utusan Sarawak
laban udah  ngenataika ucapan  tu ba surat kabar.

Penyayau enggau pengerindu enda mudah luya.

Begambar ke pengingat enggau Apak, ambai ati enggau Indai.

ANAK BUJANG

Arthur Ak Alvester Bigol

Pejam enchelak, pejam enchelak enda berasai nyau tiga minggu anak bujang aku Arthur Cleverley Persie udah dipeda mata. Naka meh pengaga asai ati apai meda nuan anak. Aku besampi anak ngarap penatai nuan   meri siti ubah ke baru dalam pengidup apai enggau indai nuan ti pemadu aku sayau Florence. Enti udah besai anak, aku ngarap nuan ulih nyadi seiku anak ti chukup ngasi nangi ke jaku orang tuai. Nyadi orang ke beguna  sereta ulih dikarapka semua orang. Maya apai ngarang tu nuan benung jenak tinduk anak. Ila enti udah besai apai ngarap ke nuan bisi tebachaka blog apai tu. Apai chukup sayau ke nuan Arthur.